សហព័ន្ធបាល់ទាត់អាស៊ី (AFC) បានប្រកាសនៅថ្ងៃនេះថា កូរ៉េខាងជើងត្រូវបានដកចេញពីការប្រកួតជម្រុះ FIFA World Cup ២០២២ នៅកាតា និង AFC Asian Cup ២០២៣ នៅចិនជាផ្លូវការហើយ។

ក្រុមជម្រើសជាតិកូរ៉េខាងជើងផ្ទាល់ មិនបានបញ្ជាក់ពីមូលហេតុនៃការដកខ្លួនពីការប្រកួតជម្រុះបាល់ទាត់ពិភពលោកនេះឡើយ ប៉ុន្តែបើតាមប្រភពសារព័ត៌មានរបស់កូរ៉េខាងត្បូងបានចុះផ្សាយថា វាពាក់ព័ន្ធទៅនឹងការព្រួយបារម្ភពីការរាតត្បាតនៃជំងឺកូវីដ-១៩។ ការដកខ្លួននេះ ក៏មានន័យថាកូរ៉េខាងជើងនឹងមិនបង្ហាញខ្លួនក្នុងការប្រកួតជើងឯកទ្វីបអាស៊ី AFC Asian Cup ២០២៣ នៅចិនដូចគ្នា។

មិនត្រឹមតែដកខ្លួនពីការប្រកួតជម្រុះ FIFA World Cup ប៉ុណ្ណោះទេ គណៈកម្មការអូឡាំពិកកូរ៉េខាងជើង ក៏បានបដិសេធចូលរួមការប្រកួតអូឡាំពិកនៅទីក្រុងតូក្យូ នាខែកក្កដា ឆ្នាំ ២០២១ នេះផងដែរ។

គួរបញ្ជាក់ថា ដោយយោងលើការកាត់បន្ថយហានិភ័យនៃការឆ្លងកូវីដ-១៩ AFC បានសម្រេចឱ្យបណ្តាពូលនីមួយៗ ត្រូវប្រកួតនៅលើទឹកដីកណ្តាលសម្រាប់ការប្រកួតដែលនៅសល់។ កូរ៉េខាងជើង នឹងត្រូវធ្វើដំនើរមកកាន់កូរ៉េខាងត្បូង ដើម្បីបញ្ចប់ការប្រកួតដែលនៅសល់រួមមានជួបជាមួយក្រុមតួកមេនីស្ថាន និងកូរ៉េខាងត្បូង ដែលនឹងចាប់ផ្តើមការប្រកួតពីថ្ងៃទី ០៣ ដល់ថ្ងៃទី ១៥ ខែមិថុនា នៅកីឡដ្ឋានទីក្រុង Goyang ភាគខាងជើងរដ្ឋធានីសេអ៊ូល។